سماجی خدمات

مقدمہ

آیت اللہ علامہ شیخ محسن علی نجفی 7 کی زندگی ایک بے مثال عزم اور خدمتِ انسانیت کی داستان ہے، جنہوں نے اپنی تمام تر توانائیوں کو امت کی اصلاح، اسلامی معاشرے کے فروغ، انسانوں کی بھلائی، اور اسلامی تعلیمات کے احیاء کے لیے وقف کر دیا۔ ”محسن ملت7“ کے لقب سے مشہور اس بزرگ عالم دین نے اپنی رفاہی اور فلاحی منصوبوں کے ذریعے ملک بھر میں نہ صرف دکھی انسانیت کی خدمت کی بلکہ معاشرتی سطح پر ایک نیا انقلاب برپا کیا۔

محسن ملت آیت اللہ شیخ محسن علی نجفی 7نے سیلاب متاثرین، زلزلہ زدگان، رمضان المبارک میں افطار و طعام، پانی، اور صحت سمیت ہر بنیادی ضرورت کے حوالے سے معاشرے کے ضرورت مند طبقے کا خیال رکھا اور ان کی زندگیوں میں آسانیاں لانے کی کامیاب کوشش کی۔

اس باب میں آپ کی فلاحی و رفاہی خدمات کا ایک جائزہ پیش کیا جا رہا ہے، جو آپ کی دینی و معاشرتی فکر کا عملی اظہار ہیں۔ یہ فلاحی منصوبے نہ صرف آپ کی شخصیت کی عظمت کو اجاگر کرتے ہیں بلکہ آپ کے مشن کو جاری رکھنے کی ایک مشعل راہ بھی ہیں، جو آپ کی زندگی کے اہداف و مقاصد اور آپ کے پیغام کو زندہ رکھے ہوئے ہیں۔