بلاغ القرآن

کتاب کا نام: بلاغ القرآن
موضوع: قرآن ترجمہ و مختصر تفسیر
مترجم: مفسر قرآن علامہ شیخ محسن علی نجفی مد ظلہ العالی
ناشر: بلاغ القرآن اسلام آباد
سال اشاعت: ۲۰۰۰
زبان: اردو

محسن ملت7 کےعلمی آثار میں سے قرآن مجید کا ایک جلدی ترجمہ و حاشیہ "بلاغ القرآن "سرفہرست ہے۔ آپؒ مسلم سماج خصوصاً علمی شعبہ سے تعلق رکھنے والے افراد کی قرآن سے دوری پر ہمیشہ شکوہ کناں نظر آتے تھے۔ آپ نے اپنے حصے کی شمع جلاتے ہوئے قرآن مجید کے اردو ترجمہ و تفسیر پر کمر بستہ ہوکر کام کیا۔ سب سے پہلے قرآن مجید کا اردو ترجمہ بلاغ القرآن کے نام سے شائع کیا۔ خداوند متعال کی خاص عنایت سے سنہ 2000 کے اواخر اور ماہ نزول قرآن رمضان المبارک میں آپ اس عظیم مشن میں کامیاب ہوئے۔ دسمبر 2000 عیسوی بمطابق رمضان المبارک 1421ھ کو دار القرآن الکریم جامعة اہل البیت کے زیر اہتمام بلاغ القرآن کی پہلی طباعت ہوئی۔ بلاغ القرآن عام فہم اور سلیس عبارات پر مشتمل ہونے نیز دور حاضر کے تقاضوں سے ہم آہنگ اور دیگر خصوصیات کا حامل ہونے کی وجہ سے علمی و عوامی حلقوں میں کافی مقبول ہوئی۔ دیگر مکاتب فکر کے لوگوں نے بھی اسے پسند کیا۔یہی وجہ ہے کہ اب تک صرف دار القرآن جامعة الکوثر کے زیر اہتمام 2024 میں اس کی چودھویں طباعت ہوئی ہے ۔اس کے علاوہ العتبۃ الحسینیۃ المقدسة کربلا ، آستان قدس رضوی مشهد،مصباح القرآن لاہور اور قرآن فاؤنڈیشن فیصل آباد سمیت کئی نشریاتی اداروں نے اس ترجمے کو50 سے زائد بار نشر کیا ہے۔ علمی و عوامی حلقوں میں اس مقبولیت کی وجہ اس کی درج ذیل امتیازی خصوصیات ہیں۔
1۔ بلاغ القرآن،قرآن مجید کا کسی بھی زبان میں ہونے والا دقیق ترین ترجمہ سمجھا جاتا ہے۔
2۔ ترجمہ کے ساتھ اہم تفسیری نکات پر مشتمل مختصر حواشی جامع اور دلنشین انداز میں درج کئے گئے ہیں۔
3۔ بلاغ القرآن کی ایک اہم خصوصیت یہ ہے کہ قرآن مجید کی موضوعاتی فہرست بھی درج کی گئی ہے جو قاری اور اہل علم حضرات کے لئے مختلف موضوعات پر آیات کی تلاش کے لئے انتہائی مفید و موثر ہے۔
4۔ بلاغ القرآن کی امتیازی خصوصیت یہ ہے کہ اس کے مقدمہ کے آخر میں قرآن کے نام سے علوم قرآنی کے بہت سے اہم ترین موضوعات کو تحقیقی اور جامع انداز میں احاطہ تحریر میں لایا گیا ہے۔
یہ ترجمہ کتابی شکل کے علاوہ موبائل ایپ اور بلاغ القرآن ویب سائٹ پر بھی میسر ہے۔