فوری امداد اور متفرقات

ایسے سینکڑوں طلبہ جو مالی مشکلات کے باعث اپنی تعلیمی فیس ادا نہیں کر پاتے ہیں، انہیں فوری مالی امداد فراہم کی جاتی ہے۔ آیت اللہ شیخ محسن علی نجفی 7 نے یہ یقینی بنایا کہ کوئی بھی مستحق طالب علم اپنی تعلیم سے محروم نہ رہے۔

اسوہ کیریئر پلاننگ سیل (UCPC)

2001 میں محسن ملت7 کی سرپرستی میں اسوہ کیریئر پلاننگ سیل (UCPC) کا قیام عمل میں لایا گیا۔ یہ ادارہ مالی مسائل سے دوچار طلبہ کے لیے تعلیمی وظائف، قرضہ حسنہ، اور کیریئر کونسلنگ جیسی خدمات فراہم کرتا ہے۔ UCPC کے ماہرین تعلیمی اداروں کا دورہ کر کے طلبہ کی رہنمائی کرتے ہیں اور انہیں ان کے کیریئر کے لیے بہترین انتخاب کرنے میں مدد دیتے ہیں۔

UCPC کے ذریعے طلبہ کو نہ صرف مالی امداد فراہم کی جاتی ہے بلکہ ان کی تعلیمی ترقی کے لیے منصوبہ بندی میں بھی معاونت کی جاتی ہے۔ یہ ادارہ معمار قوم شیخ محسن علی نجفی 7 کے اس عزم کی عکاسی کرتا ہے جو نسلِ نو کو علم کے زیور سے آراستہ کر کے ان کے خوابوں کو حقیقت میں بدلنے کی جدوجہد کا حصہ ہے۔

تعلیمی وظائف

معمارِ قوم کی طلبہ کے لیے سکالرشپس کی روشن میراث

تعلیم وہ طاقت ہے جو قوموں کی ترقی اور ان کے روشن مستقبل کی بنیاد رکھتی ہے۔ محسن ملت آیت اللہ شیخ محسن علی نجفی 7نے ہمیشہ تعلیم کی اہمیت کو سمجھا اور اپنی بصیرت سے نہ صرف مذہبی تعلیمات کے فروغ میں کردار ادا کیا بلکہ غریب اور مستحق طلبہ کے لیے معیاری تعلیم کے دروازے کھولے۔ ان کی قیادت میں ہزاروں طلبہ کو تعلیمی وظائف فراہم کیے جا رہے ہیں، جنہوں نے ان کے تعلیمی سفر کو ممکن بنایا اور انہیں اعلیٰ تعلیم کے قابل بنایا۔

تعلیمی وظائف کی فراہمی کے لیے جابر بن حیان ٹرسٹ کے تحت مختلف ادارے اور ٹیمیں تشکیل دی گئیں۔ ان کا مقصد طلبہ کی مالی معاونت، کونسلنگ، اور ان کی تعلیمی راہ کو ہموار کرنا ہے۔ مستحق طلبہ کے انتخاب کے لیے کچھ شرائط رکھی گئیں، جیسے کہ طلبہ کا تعلیمی ریکارڈ (کم از کم 70 فیصد نمبر) اور غریب خاندان سے تعلق ہونا۔