اسوہ انسٹیٹیوٹ آف ہائیر ایجوکیشن

اسوہ انسٹیٹیوٹ آف ہائیر ایجوکیشن محسن ملت شیخ محسن علی نجفیؒ کے خواب کی تعبیر و تکمیل ہے۔ شیخ صاحب کا ہمیشہ یہ عزم رہا کہ دینی اور عصری تعلیم کے درمیان ہم آہنگی پیدا کی جائے تاکہ طلباء نہ صرف دینی علوم میں مہارت حاصل کریں بلکہ عصری اور سائنسی شعبوں میں بھی امام جعفر صادق علیہ السلام کے علم کی روشنی سے استفادہ کرتے ہوئے مزید تحقیق کریں۔ ان کا مقصد تھا کہ امام جعفر صادقؑ کے علوم کا اثر جس طرح طب، فلکیات اور کیمسٹری جیسے شعبوں میں دکھائی دیتا ہے، اسی طرح ہمارے طلباء بھی ان علوم میں مہارت حاصل کریں اور ان پر تحقیق کا سفر جاری رکھیں۔

اس مقصد کی تکمیل کے لئے2020 میں اسوہ انسٹی ٹیوٹ آف ہائیر ایجوکیشن کا قیام عمل میں لایا گیا، یہ ادارہ فی الوقت پنجاب یونیورسٹی سے ملحق ہے اور ابتدائی طور پر بی بی اے اور بی ایس کمپیوٹر سائنس کی کلاسوں سے اپنا آغاز کر چکا ہے۔ یہاں بی بی اے (بزنس ایڈمنسٹریشن) اور کمپیوٹر سائنس کے پروگرامز چل رہے ہیں۔ جن میں اس وقت 11 طلبہ اپنے گریجویشن کی تکمیل کے قریب ہیں۔ اس کے علاوہ انسٹیٹیوٹ میں کلاس رومز، انٹرنیٹ، اور دیگر جدید تعلیمی سہولتیں فراہم کی جا رہی ہیں تاکہ طلباء کو بہترین تعلیمی ماحول مل سکے۔

آئندہ سال، ڈاکٹر آف فارمیسی اور دیگر صحت کے پروگرامز بھی شروع کیے جائیں گے، جن میں نرسنگ، میڈیکل لیب ٹیکنالوجی، انجینئرنگ ، اور فزیوتھراپی شامل ہیں۔ ان پروگرامز کے لیے ایک ہسپتال بھی قائم کیا جا چکا ہے، جس کا ایمرجنسی اور آؤٹ ڈور ڈیپارٹمنٹ جلد شروع ہوگا۔

یہ ادارہ درحقیقت محسن ملت کی اس عظیم الشان خواب کی تعبیر کے لئے پیش خیمہ ہے جو پاکستان انٹرنیشنل یونیورسٹی کی صورت میں اسلام آباد میں زیر تعمیر ہے۔