مجالس و محافل کا انعقاد

منبرِ حسینی ایک مقدس اور عظیم منصب ہے، جہاں سے وعظ و نصیحت کے ذریعے ہزاروں لوگوں کی رہنمائی کی جاتی ہے۔ اس منصب کی اہمیت کے پیش نظر شیخ الجامعہ آیت اللہ محسن علی نجفی 7نے مجالس و محافل کے انعقاد پر خصوصی توجہ فرمائی۔ آپ کی سرپرستی میں بہترین خطباء تیار کیے گئے جو نہ صرف تدریسی میدان میں بلکہ تبلیغی میدان میں بھی نمایاں خدمات انجام دے رہے ہیں۔ یہ تربیت یافتہ خطباء آج عشرۂ محرم اور دیگر اہم مواقع پر مرکزی مجالس کی قیادت کرتے ہیں جس سے جو محسن ملت 7کے مشن کی کامیابی کی ایک کڑی ہے۔

محسنِ ملت7 نے عزاداری کے تحفظ اور ترویج کو ہمیشہ ترجیح دی اور اس کے لیے متقی ، دین شناس، اور وقت کے تقاضوں کو سمجھنے والے خطباء کی ضرورت پر زور دیا۔ اس سوچ کے تحت محسن ملت نے متعدد اقدامات فرمائے جن میں مدرسہ خدیجہ الکبریٰ سلام اللہ علیہا للواعظین (2016)کا قیام ، جہاں خطابت کا چار سالہ کورس کرایا جاتا ہے، اور جامعہ الکوثر میں شعبۂ تربیت واعظین (2022) کا قیام شامل ہیں۔ جس میں فنِ خطابت، تاریخ، تفسیر موضوعی، اور عقائد جیسے اہم موضوعات پر طلبہ کو عملی تربیت دی جاتی ہے۔ ہر طالب علم کی تقریر کی خامیوں اور خوبیوں کی رہنمائی اساتذہ کرتے ہیں، تاکہ وہ دین کے پیغام کو بہترین انداز میں پہنچا سکیں۔

ان اداروں کے تربیت یافتہ علماء و خطباء اندرون و بیرونِ ملک مجالس عزاء اور دیگر دینی اجتماعات سے خطاب کرتے ہیں۔ محرم و صفر کے دوران ۲۵۰ خمسہ مجالس اور 250 سے زائد سالانہ عشرے منعقد ہوتے ہیں، جبکہ ایامِ فاطمیہ کے احیاء کے لیے ملک بھر میں خمسۂ فاطمیہ کا اہتمام کیا جاتا ہے۔ ان مجالس کے ذریعے عزاداری امام حسین علیہ السلام کے تحفظ، تعلیمات کے ابلاغ، اور دین کی ترویج میں مؤثر خدمات انجام دی جا رہی ہیں۔ ”ایام فاطمیہ “ کے نام سے ہادی ٹی وی کی خصوصی نشریات بھی اس مشن کا حصہ ہیں، جو علومِ محمد و آلِ محمد کو شائستہ اور باوقار انداز میں دنیا تک پہنچانے کی کوششوں کا تسلسل ہیں۔