شعبہ نشر و اشاعت جامعۃ الکوثر

شعبہ نشر و اشاعت جامعۃ الکوثر کا ایک اہم اشاعتی ادارہ ہے جو اپنے علمی اور تصنیفی خدمات کے ذریعے معاشرے تک مستند علمی و تحقیق، تعلیمات قرآن مجید اور پیغام محمد و آل محمد Dپہنچانے میں مصروف عمل ہے۔ یہ ادارہ محقق و مفسر محسن ملت آیت اللہ علامہ محسن علی نجفی7 کی تحقیقات اور تصنیفات کو شائع کرتا ہے۔ محسن ملت7 کی تصانیف اور تحقیقی مواد کو نئی نسل کے لیے محفوظ اور قابلِ رسائی بنایا جا تا ہے تاکہ یہ قیمتی علمی ورثہ لوگوں تک پہنچے اور نئی نسل کے لیے محفوظ بھی رہے۔ اس کے علاوہ، جامعۃ الکوثر کے دیگر محققین کی تحقیقات، تخلیقات، مجلات اور دیگر کتب کی اشاعت کی ذمہ داری بھی انجام دیتا ہے۔

ادارہ کی یہ کاوشیں جامعۃ الکوثر کی برکت سے جاری ہیں۔ شعبہ نشر و اشاعت نے مختلف موضوعات پر مشتمل ہزاروں کی تعداد میں کتب شائع کی ہیں، جو متلاشیان حق و حقیقت اور علم جو افراد کی علمی تشنگی بجھانے کا ذریعہ بن رہی ہیں۔ ادارہ نشرو اشاعت دین مبین کے مستند اور حقیقی پیغام کی اشاعت و ترویج کے ذریعے مختلف مکاتبِ فکر میں علمی ہم آہنگی کو فروغ دینے اور امر اہل بیت کو زندہ رکھنے کا سبب بن رہا ہے۔

محسن ملت کی تصانیف اسلامی علوم کے مختلف موضوعات پر مبنی ہیں، جن میں قرآن، فلسفہ، الہیات، فقہ اور اخلاقیات شامل ہیں۔ آپ کی تصانیف اور تراجم کی تعداد 30 سے زائد ہے۔ آپ کی پہلی تصنیف ”النہج السوی فی معنی المولیٰ والولیٰ“ ہے، جو عربی زبان میں تحریر کی گئی اور ولایت کے مفہوم کی وضاحت عمدہ انداز میں کرتی ہے۔ آپ کی آخری تصنیف ”دراسات عصریہ فی الالھیات“ ہے، جو جدید الہیات کے تناظر میں اسلامی فکر کو اجاگر کرتی ہے۔ اس کے علاوہ، محسن ملت کی مشہور تصنیف ”الکوثر فی تفسیر القرآن“ ہے، جو دس جلدوں پر مشتمل ایک جامع تفسیر ہے۔ اس وقت آپ کی تین کتابیں زیر طبع ہیں، جو جلد ہی منظر عام پر آئیں گی۔

محسن ملت کی تصانیف کو دنیا کے دیگر خطوں تک پہنچانے کے لیے ان کا مختلف زبانوں میں ترجمہ بھی کیا گیا ہے، جن میں انگریزی، فارسی، اور سندھی شامل ہیں۔ مختلف زبانوں میں ترجمہ شدہ کتب میں ”مقدمۃ القرآن“(انگریزی)، ”الکوثر فی تفسیر القرآن“(فارسی اور انگریزی زیر طبع) اور ”راہنما اصول“ (سندھی) شامل ہیں۔ ان تراجم کا مقصد اسلامی تعلیمات کو عالمی سطح پر پھیلانا اور ان کی فہم کو آسان بنانا ہے، تاکہ اسلامی نظریات کو مختلف زبانوں میں عام کیا جا سکے۔

آپ کی تصانیف کو دو اہم زمرے میں تقسیم کیا جا سکتا ہے: نصابی اور غیر نصابی کتب۔ نصابی کتب میں ”دراسات عصریہ فی الہیات“، ”دراسات ایدولوجیہ المقارنہ“، ”تلخیص المعانی“ اور ”تلخیص المنطق للشیخ المظفر“ شامل ہیں۔ دوسری طرف، محسن ملت کی غیر نصابی کتب میں الہیات، فلسفہ، قرآنیات، عبادات، ادعیہ، معاملات، اخلاقیات جیسے اہم موضوعات پر تفصیل سے روشنی ڈالی گئی ہے۔۔ اس وقت آپ کی تین کتابیں ”کشکول“، ”الخطابۃ امانۃ و رسالۃ“، اور ‘‘تفسیر موضوعی” زیر طبع ہیں، جو جلد ہی منظر عام پر آکر مستقبل میں ان کے علمی کارناموں کا حصہ بنیں گی۔