سفیرانِ ہدایت

محسن ملت 7 کی قیادت میں اسلامی اقدار کے فروغ کا پلیٹ فارم

سفیران ہدایت ایک منفرد پلیٹ فارم ہے۔ جو اسلامی معاشرتی اور دینی اقدار کے فروغ کے لیے سرگرم عمل ہے۔ اس پلیٹ فارم کا بنیادی مقصد آئمہ جمعہ و جماعت کو منظم اور تربیت یافتہ بنا کر معاشرے میں مثبت تبدیلی لانا ہے۔ مساجد کو صرف عبادت گاہوں تک محدود رکھنے کے بجائے، تعلیم و تربیت کے فعال مراکز میں تبدیل کرنا اس پلیٹ فارم کی اہم ترجیحات میں شامل ہے۔

یہ پلیٹ فارم آئمہ کرام کے ساتھ مستقل رابطہ برقرار رکھنے، علمی و تحقیقی مواد فراہم کرنے اور فقہی و عقائدی سوالات کے لیے ہیلپ لائن کا قیام عمل میں لایا ہے۔ آئمہ کو مالی تعاون فراہم کرنا، خصوصاً رمضان اور عیدین جیسے مواقع پر اضافی مدد دینا،سفیران ہدایت کی اہم خصوصیات ہیں۔ آن لائن دروس اور کورسز کے ذریعے اس پلیٹ فارم نے تعلیمی ضروریات پوری کرنے میں بھی نمایاں کردار ادا کیا ہے۔

سفیران ہدایت کا آغاز یکم جنوری 2022 کو جامعۃ الکوثر اسلام آباد سے ہوا، جو محسن ملت شیخ محسن علی نجفی 7کی سرپرستی میں قائم ہوا۔ محسن ملت7 معاشرتی اصلاح اور تعلیم کے فروغ کے علمبردار تھے۔ آپ نے اس پلیٹ فارم کے ذریعے آئمہ کو دینی تربیت کے ساتھ ساتھ عملی زندگی میں مؤثر کردار ادا کرنے کا وژن دیا۔

سفیران ہدایت کے بنیادی اہداف اور خدمات

سفیرانِ ہدایت آئمہ جمعہ و جماعت کے ساتھ قریبی رابطہ قائم رکھنے کے لیے فعال کردار ادا کرتا ہے۔ اس پلیٹ فارم کے تحت آئمہ جماعت کی رجسٹریشن کی جاتی ہے اور ضلعی، صوبائی، اور مرکزی سطح پر اجلاس منعقد کیے جاتے ہیں تاکہ ان کے مسائل اور خدمات کو بہتر بنایا جا سکے۔ تعلیمی میدان میں آئمہ جماعت کو خطبات اور دروس کے لیے تحقیقی مواد فراہم کیا جاتا ہے۔ فقہی اور عقائدی سوالات کے لیے ہیلپ لائن موجود ہے، اور آن لائن دروس کا انعقاد کیا جاتا ہے۔ مالی تعاون کے تحت مستحق آئمہ کو ماہانہ امداد فراہم کی جاتی ہے، جبکہ رمضان اور عیدین جیسے مواقع پر خصوصی معاونت بھی مہیا کی جاتی ہے۔ آئمہ کی خدمات کو سراہنے اور ان کے مقام کو نمایاں کرنے کے لیے انعامات اور تعلیمی مواد پیش کیے جاتے ہیں۔ مساجد کے باقاعدہ دوروں کے ذریعے آئمہ کی کارکردگی کا جائزہ لیا جاتا ہے، اور ان کی معلومات کو اپڈیٹ رکھنے کا نظام اس پلیٹ فارم کے مقاصد کو مؤثر بنانے میں مددگار ثابت ہوتا ہے۔

علمی خدمات:

سفیرانِ ہدایت کی ٹیم پیش نمازوں کے لیے ہر اسلامی مناسبت پر علمی مواد فراہم کرتی ہے۔ یہ مواد واٹس ایپ کے ذریعے پی ڈی ایف اور تحریری شکل میں بھیجا جاتا ہے، جس سے آئمہ جماعت کو موضوعات کی تیاری میں آسانی ہوتی ہے۔ ہر ہفتے جمعہ کے خطبے کا مخصوص مواد بھی فراہم کیا جاتا ہے۔

دورانِ سال مختلف اسلامی مناسبتوں پر خطبات اور علمی مواد فراہم کیا جاتا ہے، جن میں شہادت، ولادت، رحلت، اور دیگر خصوصی ایام شامل ہیں۔ ان مواقع پر انبیاء اور آئمہ اہل بیتD کی حیات اور کردار کے پہلوؤں کو اجاگر کیا جاتا ہے، جیسے وحدتِ امت اور اخلاقی و علمی عظمت۔

مالی خدمات:

سفیرانِ ہدایت مستحق آئمہ کو ماہانہ ہدیہ فراہم کرتی ہے۔ ”پیش نماز“ کو 2000 روپے ماہانہ اور ”مبلغین“ کو 3000 روپے یا اس سے زائد ہدیہ دیا جاتا ہے۔ اگر کوئی پیش نماز وفات پا جائے تو ان کے اہل خانہ کو 4000 روپے ماہانہ امداد دی جاتی ہے۔ رمضان اور عیدین جیسے مواقع پر خصوصی مالی امداد بھی فراہم کی جاتی ہے۔ یہ خدمات آئمہ کے معاشی استحکام اور دینی خدمت کے فروغ میں معاون ہیں۔

علمی کتب کی فراہمی اور علماء کی حوصلہ افزائی

سفیرانِ ہدایت کی جانب سے مختلف مواقع پر علماء کرام کو علمی کتب فراہم کی جاتی ہیں تاکہ ان کی دینی خدمات کو مؤثر بنایا جا سکے۔ خاص طور پر ماہ رمضان میں روزے اور احکام سے متعلق کتاب ”ماہِ رمضان، ماہِ عبادت“ رجسٹرڈ پیش نمازوں کو ارسال کی گئی، جو گزشتہ دو سالوں میں تقریباً 1800 علماء تک پہنچی۔ اسی طرح، محرم الحرام کے دوران فعال پیش نمازوں کو کتاب ”انقلابِ حسینG“ فراہم کی گئی، جو مجالس کی تیاری کے لیے انتہائی مفید ثابت ہوئی۔

ریکارڈ اپڈیٹ رکھنے کا نظام

سفیرانِ ہدایت پیش نمازوں کی معلومات کو اپڈیٹ رکھنے کے لیے منظم طریقہ اپناتی ہے۔ ہر چھ ماہ بعد ”ری رجسٹریشن“ کے ذریعے پیش نمازوں کی تازہ ترین تفصیلات حاصل کی جاتی ہیں، جیسے ان کی خدمات اور ملازمت کی صورتحال۔ مساجد کا باقاعدہ سروے بھی کیا جاتا ہے، جس میں ان کی کارکردگی اور مساجد کی حالت کا جائزہ لے کر بہتری کے اقدامات کیے جاتے ہیں۔ پیش نمازوں سے مستقل رابطہ اور ان کی فعالیات کی ویب سائٹ پر اپلوڈنگ کا انتظام بھی کیا جاتا ہے۔ اگر کسی کو تکنیکی مدد درکار ہو تو ٹیم مکمل رہنمائی فراہم کرتی ہے۔ اس پورے نظام کا مقصد تازہ ترین معلومات کو محفوظ رکھنا اور مؤثر رابطہ قائم کرنا ہے۔

پیش نمازوں کی رجسٹریشن اور شہریہ کی ادائیگی کا نظام

سفیرانِ ہدایت پیش نمازوں کے لیے شفاف اور منظم شہریہ ادائیگی کا نظام اپنائے ہوئے ہے۔ ہر پیش نماز کو واٹس ایپ کے ذریعے شہریہ کی اطلاع دی جاتی ہے، جس میں ادائیگی کی تاریخ اور دیگر تفصیلات شامل ہوتی ہیں، تاکہ وہ بروقت تصدیق کر سکیں۔ تمام ادائیگیوں کا ریکارڈ محفوظ رکھا جاتا ہے، جو وقتاً فوقتاً جانچ کے لیے دستیاب رہتا ہے۔

پیش نمازوں کی رجسٹریشن ملک کے تمام صوبوں اور آزاد جموں و کشمیر، گلگت بلتستان سمیت مختلف ریجنز میں کی جاتی ہے۔ ان میں سندھ، پنجاب، خیبر پختونخوا، بلوچستان اور شمالی علاقہ جات کے بڑے اور چھوٹے اضلاع شامل ہیں۔ ہر ریجن کے پیش نمازوں کی تعداد اور ان کی فعالیات کا مکمل ڈیٹا باقاعدہ اپڈیٹ کیا جاتا ہے تاکہ تنظیمی اہداف حاصل کیے جا سکیں۔

سفیرانِ ہدایت میں شمولیت کے اصول اور طریقہ کار

سفیرانِ ہدایت میں شمولیت کے لیے بنیادی شرائط میں یومیہ کم از کم دو وقت کی جماعت کروانا اور سرکاری ملازمت نہ ہونا شامل ہیں۔ ہر علاقے میں نمائندے کے ذریعے پیش نمازوں کی فہرست تیار کی جاتی ہے۔ شرائط پر پورا اترنے والے افراد کو رجسٹر کرکے انہیں ماہانہ ہدیہ جاری کیا جاتا ہے۔

علماء کرام کی خدمات اور فعالیات

علماء کرام اپنے اپنے علاقوں میں دینی و سماجی خدمات بھرپور انداز میں انجام دے رہے ہیں۔ ان کی سرگرمیوں میں مجالس، دروس و تفاسیر، اور تعلیمی و تربیتی پروگرامز شامل ہیں جو بڑوں اور بچوں کی دینی و اخلاقی تربیت میں مددگار ثابت ہوتے ہیں۔ ان خدمات کا جائزہ لینے اور بہتر طور پر منظم کرنے کے لیے سفیرانِ ہدایت نے ایک ویب سائٹ متعارف کرائی ہے، جہاں علماء اپنی خدمات اور سرگرمیوں کی تفصیلات اور تصاویر اپلوڈ کر سکتے ہیں۔ یہ ویب سائٹ نہ صرف سفیرانِ ہدایت کی ٹیم بلکہ پیش نمازوں کے لیے بھی مفید ہے، جس سے باہمی تعاون اور ربط کو فروغ ملتا ہے۔